Ang pagdawat sa pulong sa Dios

Minahal kong mga igsoon, timan-i kini! Kinahanglan nga andam kamong tanan sa pagpamati apan dili madalidalion sa pagsulti o dali nga masuko. (JAMES 1:19)

.

Ang buot ipasabot ni Pablo mao ang pagpaminaw sa pulong sa Dios--ang pagpaminaw sa pagpanudlo sa kamatuoran gikan sa tinubdan. Adunay panultihon nga nagkanayon: Ang tawo naay duha ka dalunggan apan usa ka dila; sa ingon kanunay kitang abtik maminaw ug modawat sa pagpanudlo kaysa abtik sa pagsulti.

.

ANG ATONG KAANDAM PAGPAMINAW. Magpakahilom ka lang. “Kon magpataka kag sulti, lagmit kang masayop. Kon maalamon ka, magpakahilom ka lang” (PROVERBS 10:19). Pagmatngon sa imong buhaton aron dili ka makasala pinaagi sa imong pagpanulti. Ayaw pagsulti samtang anaa ka duol sa daotang mga tawo. Pagmatngon usab sa imong isulti aron dili ka mahiapil sa kasamok.

.

Pagmalinawon sa kaugalingon. “Ang tawong nasayod sa iyang katakos dili magpunayg sulti, ug ang tawong kalma may matuod nga panabot” (PROVERBS 17:27). Ang buang magpunay lag sulti apan ang malumong mga pulong sa tawong kalmado naghatag ug kinabuhi. Kinahanglan  ipakita nato sa atong kinabuhi pagka-maalam ug masinabuton.

.

ANG ATONG KAHINAY NGA MASUKO. Ayaw pagpatuyang. “Ayaw patuyangi ang imong kasuko; binuang ang paghambin ug kayugot” (ECCLESIASTES 7:9). Kung sige kang masuko, dali ra sad kang masayop apan kung ikaw maalamon mopailub ka kay mas maayo ang mapailubon mas maayo usab ang makapugong sa imong kaugalingon.

.

Bantayi nga dili ka masuko dayon. “Apan karon sultihan ko kamo nga ang masuko bisan walay igong hinungdan. sa iyang isigkatawo dad-on ngadto sa maghuhukom ug ang maghingalag kuwanggol sa iyang isigkatawo manubag niini ngadto sa Labawng Hukmanan ug bisan kinsa nga moingon nga buang ang iyang isigkatawo malagmit nga mahiagom sa kalayo sa impiyerno” (MATTHEW 5:22). Kon masuko ka, bantayi nga dili ka makasala ug ayaw palungtara ang imong kasuko sa tibuok adlaw. Kung mahimo, biyai na lang ang kasuko ug pagkasaputon. Ang pagsige nimo ug pagdumot sa imong isigkatawo nagpakita nga ikaw usa ka mamumuno. Ug nasayod ka nga ang mamumuno wala magbaton sa kinabuhing walay kataposan.

.

Hunahunaa una sa dili ka pa mosulti ug hinumdumi, kitang tanan masayop apan maninguha kita nga dili masayop sa atong pagpanulti aron kita mahimong hingpit ug makahimo sa pagpugong sa atong kaugalingon.  AMEN